Pas zhdukjes së disa projekteve muzikore nga YouTube,
këngëtarja Egli Tako ka reaguar publikisht përmes një deklarate të sinqertë, duke sqaruar situatën dhe duke falënderuar ndjekësit për mbështetjen e tyre të pandërprerë.
Ajo bëri të qartë se, ndonëse është pjesë e këngëve të publikuara, nuk është autore e tyre dhe nuk ka të drejta pronësore mbi to.
Fshirja e përkohshme e materialeve është bërë për arsye personale të autores, në këtë rast këngëtares Fifi, e cila ka kontrollin mbi projektin dhe kanalin ku janë publikuar.
“Unë nuk kam ndërhyrë sepse nuk janë materiale të miat. Si e ftuar në projekt, respektoj vendimet e palës tjetër”, u shpreh Egli. Ajo theksoi se, pavarësisht ndikimit që mund të ketë pasur situata, zgjedh të mbetet mirëkuptuese:
“Jemi njerëz para se të jemi artistë.”
Në reagimin e saj, Egli bëri me dije edhe një vendim të marrë në mirëkuptim me Fifin: ndarja menaxheriale, për të shmangur çdo keqkuptim të mëtejshëm.
Ajo konfirmoi se do të vazhdojë rrugëtimin artistik e vetme dhe paralajmëroi surpriza për fansat në javët në vijim.
“Do të më shihni më shumë, me projekte të reja dhe shumë muzikë”, përfundoi ajo, duke falënderuar ndjekësit për dashurinë dhe përkrahjen.