Mjeku, studiuesi dhe shpikësi i pilulës së abortit,
vdiq të premten në moshën 98-vjeçare, njoftoi bashkëshortja e tij Simone Arari Beaulieu për Agence France-Presse.
I lindur më 12 dhjetor 1926 në Strasburg si Étienne Blum, ai mori emrin Beaulieu kur iu bashkua Rezistencës franceze në moshën 15-vjeçare. U diplomua si mjek në vitin 1955 dhe si doktor i shkencave në 1963, ndërsa karrierën e tij ia kushtoi endokrinologjisë dhe kërkimeve mbi hormonet steroide.
Në vitin 1963, themeloi Njësinë Kërkimore 33 në INSERM, të cilën e drejtoi deri në vitin 1997. Kjo njësi u bë qendra e zhvillimit të RU 486 – pilula e abortit – në vitin 1982, një zbulim që revolucionarizoi të drejtën e grave për ndërprerjen vullnetare të shtatzënisë.
Pavarësisht kritikave të ashpra dhe kërcënimeve që mori, Beaulieu mbrojti pa kompromis shkencën dhe të drejtën e grave për të zgjedhur. “Hulumtimi i tij u nxit nga përkushtimi ndaj progresit, lirisë së grave dhe dëshira për një jetë më të gjatë e më të mirë për të gjithë,” tha bashkëshortja e tij.
Ministrja franceze për barazi gjinore, Aurore Bergé, u shpreh: “Ai u udhëhoq gjatë gjithë jetës nga një imperativ: dinjiteti njerëzor.”
Dy vite më parë, Beaulieu kritikoi ashpër ndalimin e pilulës së abortit në një shtet amerikan, duke e quajtur atë një “regres të lirisë së grave”, të nxitur nga “fanatizëm dhe injorancë”.
Kërkimi i tij nuk u ndal me RU 486. Ai studioi DHEA-n, një hormon me efekt potencial kundër plakjes, si dhe neurosteroidet që ndikojnë në sistemin nervor. Në vitin 2008, themeloi Institutin Baulieu, për t’iu përkushtuar studimit të sëmundjeve neurodegjenerative, përfshirë sëmundjen e Alzheimerit.
Në zyrën e tij në Spitalin Universitar Kremlin-Bicêtre, ku punonte deri tre herë në javë edhe në moshë të thyer, Beaulieu ruante fotografi, diploma, dokumente kërkimore dhe skulptura nga artistja dhe mikja e tij Niki de Saint-Phalle. Deri në fund, ai dëshironte të ishte “i dobishëm”.
“Është mirë të zbulosh diçka kur je në këtë profesion,” kishte thënë për AFP-në. “Pasionet e mia? Gratë, truri dhe jetëgjatësia.”
Beaulieu u nderua me shumë çmime, përfshirë Kryqin e Madh të Legjionit të Nderit në Francë dhe Çmimin Lasker në SHBA – një ndër nderimet më të larta shkencore amerikane.
Ai la pas bashkëshorten e tij Simone, tre fëmijë, tetë nipër e mbesa dhe nëntë stërnipër e stërmbesa.